Trikamjee o tlhokafala morago ga bolwetse jo bo khutswane

Batho ba tsa molao le ba bodumedi ba hutsafaditswe ke go tlhokafala ga moeteledipele yo o tlhomologileng, Ashwin Trikamjee.

Trikamjee, o tswa kwa Morningside.

O ne a tlhokafala kwa bookelong mo mosong wa Labone morago ga go lwala ka lobakanyana.

Ditebogo di ntse di oketsega fa e sa le dikgang tsa loso lwa gagwe di itsisiwe.

Moporesitente Cyril Ramaphosa o ne a neela balelapa la ga Trikamjee, ditsala le badirimmogo le ene matshediso.

A mo tlhalosa jaaka “sekai se se tlhomologileng sa go direla setšhaba sa rona”.

“Go ineela ga ga Rre Trikamjee mo dilong tsa semoya go ne go feta go nna Mo-Hindu ga gagwe.

O ne a buelela go itshokelana le go dirisana mmogo ga ditumelo tse di farologaneng.

Ashwin Trikamjee o ne a tshela botshelo jwa go dira dilo tse di farologaneng.

Dilo tse a neng a di dira go tokafatsa matshelo a baagi le go nna le seabe mo mekgatlhong e a neng a direla mo go yone.

Re tla tlhologelelwa go nna teng ga gagwe ka bonolo, a ritibetse maikutlo.

Kgakololo ya gagwe e e botlhale le tirelo ya gagwe e e boikokobetso.

A mowa wa gagwe o robale ka kagiso”, Ramaphosa a rialo.

Trikamjee, yo o nang le dingwaga di le 80, e ne e le moeteledipele wa Hindu Maha Sabha ya Afrika Borwa.

E bile e le mogakolodi yo mogolo kwa Garlicke & Bousfield yo o neng a iketleeleditse go rarabolola dikgotlhang tsa kgwebo le molao wa lekgetho.

O ne a kile a direla mo dikomiting tsa makgotla a le mmalwa a a amanang le puso le dikhampani tse dikgolo.

Translator: Onkarabile Manganye