Cassper Nyovest O Tla Tshwara Dikgele Tsa bo32 tsa SAMAs

Cassper Nyovest o netefaditswe e le motshwari wa dikgele tsa bo32 tsa South African Music Awards (SAMAs), tse di tla tshwarelwang kwa Sun City Superbowl kwa Bokone Bophirima ka la 15 Phatwe 2026.

Cassper o itsisitse dikgang tseo ka bidio e a e abelaneng mo ditlhangweng tsa gagwe tsa maranyane, a bontsha boitumelo jwa go nna karolo ya tiragalo eno e kgolo ya mmino.

O boletse gape gore ene le ba SAMAs ba fedisitse dikgotlhang tse di neng tsa nna teng ka dingwaga di ka nna lesome.

A re ba fitlheletse tumelano e ntšha mme o dumela gore tiragalo ya ngwaga ono e tla nna e kgolo go feta tsotlhe.

Cassper o senotse gore go sa ntse go tla nna le ditshenolo tse dingwe mabapi le dikgele tseno mo dibekeng tse di tlang.

Bokone Bophirima bo setse bo kile jwa tshwara dikgele tsa SAMAs makgetlo a le mmalwa, mme bo itsege e le legae la tiragalo eno.

• BUISA GAPE: Mzansi Magic e Tsenya Lenaneo La Mmatota, Amabhinca

MEC wa Botaki, Setso, Metshameko le Boitapoloso kwa porofenseng eo, Galebekwe Tsotso Tlhapi, o rile porofense e ipaakanyeditse gape go amogela mongwe wa meletlo e megolo ya mmino mo Aforika Borwa.